North Eastern Hills University (NEHU) Tura campus-na saksa gitchambegipa skigipa Prof. Fameline Marak-ko March 26 tariko gital Pro Vice Chancellor songangaha. Uko rimchaksonagita da·al sal 10:30 bajimango joining ceremony-ko ong·ataha jeon bang·a faculty member-rang, administrative staff-rang aro chatro chatrirang bakko ra·angtokaha.
Prof. Marak saksa niksenggipa academician aro NEHU Tura campus-ni gitchambegipa faculty member ong·a. Ua June 1 tarik 1996 bilsio NEHU-o kam ka·na a·bachengaha. NEHU Tura-o bilsi 30 gapna am·pile uni kam ka·anio Marak A·chik jatni daka-rika aro ku·ko ripingna mingnamgipa on·gilanirangko dakaha jean poraia skiani a·bao namen namgni gnanggipa aro mande ra·na kragipa ong·a.
Ua, dingtang mancha NEHU Tura campus-na on·kange kam ka·na jeon chatro chatrirangna aro faculty member-rangna namroro silrorona cholrangko on·agita re·mikkangna a·kange ra·angaha. Marak uko PVC songanina katchaan baksa ra·chake poraia skiani gadangko tang·doatna, rika cho·aniko bariatna aro research ba am·sandirikote songsalna on·kanganggen ine aganangaha. Unikoa, mikkangchi ka·rimskarang, chatro chatrirang aro gipin bak rengsi gnanggiparang baksa ku·cholsan bakrime NEHU Tura-ko chu·a gadangona ra·doangnaba aganangaha.
Marak-ko PVC songaniko NEHU-ni nokdang kusi ong·en namniktokaha aro katchapaaniko on·atenba uni ning·o campus-ko silrorona ka·donganiko parakangtokaha.
