College of Community Science (CSS), Central Agricultural University (CAU) Tura-o “Understanding the National Curriculum of NEP 2020 on Early Childhood Care and Education” katta bichongko done da·al salo Workshop ko a·bachengatangaha. Ia workshop ko da·al sal chongmotan March 25 oni 26 tarikona ong·atangenga. Ian dingtang mancha National Education Policy (NEP) 2020-o pangchakgimin niamrango pangchake bi·sarangna nanggipa simsakaniko aro pora skianiko on·a ma·sie ra·na ia workshop-ko ong·atangenga.
Ia workshop-ona Education Minister Rakkam A Sangma mongsonggipa sokgipa ong·e bakko ra·angaha. Apsandake ia tom·bimonganio West Garo Hills a·jani Deputy Commissioner Jagdish Chelani IAS, Meghalaya State Commission for Protection of Child Rights ni Member JS D. Mawiong aro West Garo Hills a·jani Divisional Forest Officer Ganesan P. ba bakko ra·angaha.
Ia workshop ko a·dokni Education Minister Rakkam Sangma oprake on·angaha jeon ua pora skiani mande sakantina aro songsalna gamchataniko agananengon, India a·songni chadamberangko mikkangchina tarisamsona dingtang mancha changa sapanio pangchake bidako pakwatna nanganikoba janapangaha. National Education Policy (NEP) ni bidingo janapon, changa sapaniko bariatna skichakram biaprango aganritingbagipa aro chasong gitalni u·i ma·sianiko apsan dake skie ra·na nanganiko Sangma aganangaha. Una agreba ma·gipa aro bi·sani an·seng baljokaniko rakkie namgipa bida aro sanna bannaniko sokatna sorkarini kam ka·enganikoba aganange chatro chatrirangni dal·roroanina skigipa, niam tarigipa aro institution rangni apsan bakrimna nanganikoba janapangaha.
Bi·sarangna mikkangchi pora skiani a·bao maming neng·nikaniko chagrongna nangjanagita uamangni chonmiting somoion nangchongmotgipa bidako ba pangchakaniko bilakatna on·a nanganiko West Garo Hills ni Deputy Commissioner Jagdish Chelani aganangaha. Pora skiani gamchataniko aro ia a·bako namdapatna sorkarini dingtang dingtang cholrangchi chugipa gadangni skie ra·aniko on·a aro rika cho·aniko nambatatna kam ka·aniko janapangan baksana skigiparangni, institution rang aro niam tarigiparangni education sector ko namdapatna bimchipe kam ka·enganinaba mittelpilskaangaha.
Ia sal gni ni workshop-o Women of Child Development Department, Social Welfare-o kam ka·giparang, u·i ma·sigiparang NEP 2020 aro Early Childhood Care and Education (ECCE)-ni bidingo skie on·aniko dakanggen ine Tura, Meghalaya ni CCS, CAU (I) ni Dean Jyoti V. Vastrad tom·bimonganiona sokbagiparangna agantalatangaha.
Ia workshop-o National Curriculum Framework (NCF) ni bakrang jekai bi·sarangni gisikko nambate u·ie masie ra·ani, kal·anirango pangchake skie on·ani, bi·sarangni dal·drobamiting somoio ma·gipa pagiparangni simsak nirokna nangani, kal·ani bimangrangko u·ie skie ra·ani aro poraia skianiko apsangrik man·ani cholrangko skie on·anggen ineba parakataha.
