World War l-o dakgrikgipa matgrikrangko gisik ra·na Tura Babupara-o tarie dongipa Cenotaph-ko nosto ka·ani jamano, gital taridapaniko dakna committee-rangko songaniko dingtang dingtang NGO-rang, songdongkamgiparang aro u·i ma·sigipa manderang nipiltaianiko dake dingtangatchina Chief Minister Conrad Sangma-ko mol·molataha.
Ia Cenotaph-ara indin tarigipasan ong·aija A·chik matgrikrangni an·tangtangko on·kanganiko gisik ra·ani chingita dingtangmancha tarigipasa ong·a ine uamang aganangaha. Ia committee-ko dilna Deputy Commissioner aro Tura Municipal Board-ni CEO-ni palo Cabinet Minister, Opposition-ni dilgipa ba Chief Secretary-ko donskachina aganangaha. DC aro TMB-ni CEO-o, manderang ka·dongani komiaha ine uamang parakataha.
Autonomous District Council-ni jatni bewalko rakkina man·agita GHADC-ni Tura-ko nirokenggipa MDC-ko donchina bakrimgimin dol janapataha. Unbaksana Senior Citizens’ Association-niko sak 3 dilgiparangko, Civil Society-oniko sak 3 aro poraigipa chatro chatrirang, historians aro songsalko dilgipako donskachina aganangaha.
Ia Cenotoph-ko taridapani pilak kamon manderangna u·iate aro nangnikaniko ra·e ba ma·sie kam ka·chinaba uamang parakataha. Jatni gamjinko ripinganio u·i ma·sigipa manderangkoba committee-ni bak ong·atchina bakgrimgimin NGO dolrang Chief Minister Conrad Sangma-na janapataha.
