Meghalaya a·doko garirangko sale ramarango a·sel ong·anirang batroroenganina a·dok sorkari bang·a sorokrango speed limit-ko donchina police department-ko ge·etataha. Urban Affairs-ni daito ga·akgipa Deputy Chief Minister Sniawbhalang Dhar, iani bidingo talatengon police-rangko ta·rake salgiparangko nirokchina didiataha ine aganangaha.
A·dokni bang·a bakrango da·ororo ta·rakbee salenggiparang dongani gimin ramao gari a·sel ong·anirang batroroenga jeon janggi galaona aro bilongbee saknaa man·anirangko chagrongenga. Garo Hills-oba batanggimin salrango Bansamgre aro Tura-o a·sel ong·e adita sak manderang janggi galaha jeon Tura-o ong·gipao chadambe saksa a·gilsako wate re·angna nangaha.
Iarang pilako niate aro ramarango a·sel ong·anirang batroroenganina Meghalaya sorkari da·o speed limit machine-ko tekna tik ka·angaha. Iani bidingo daito gnanggipa department-rang gipin bak donggipa department-rang baksa tom·aniko dakangaha. Tom·anio uamang a·sel ong·ronggipa biaprangni gimin golporimangaha aro namgipa ja·kurangko ga·e champengnagita miksongangaha.
