March 23 tarik 2025, Robibar attamni 6:30 mangni somoio East Garo Hills ni Bansamgre jolo Maruti Gypsy bolsa ramao a∙sel ong∙anio sak 2 manderang sia. Ia gari-ara gitcham NGO ni dilgipa Saljrang R Marak ni ong∙a ine u∙ina man∙aha jekon uni jikgipa ia gariko tarakbee chalaimitingo an∙tangni bilo dona man∙jae indakgipa a∙sel ona sokataha.
Kisango a∙songgipa sak 2 manderang ia obosta ong∙miting somoio gari ning∙aoni til∙doange ramao bilsubeee onchongani a∙sel a∙damon janggiko galna nangaha. Sianggipa manderangara Samanda Dolwarigre ni Tengjring M Sangma (28) aro South Garo Hills Rongara Chengni ni Billar R Marak (24) ong∙a.
Saknaa man∙gipa manderangara Samanda Dolwarigre ni Saljrang R Marak (31) aro gariko chalaigipa Balsrigittim, Williamnagar ni Dikrikchi N Sangma (28) ong∙a jerangkon Williamnagar Civil Hospital ona sanna bannaniko dakna rimangaha. Indake gariko tarakbee chalaiani a∙sel batanggimin sal somoirango Garo Hills ni dingtang dingtang biaprango bang∙a a∙sel ong∙anirangko nikangna man∙angaha.
