Congress dolko Garo Hills jolo bilakdapatna miksonge aro re·baenggipa Garo Hills Autonomous District Council election na tarisamsona, West Garo Hills Tura Dakopgre ni SMELC building-o salsani youth training program ko Meghalaya Pradesh Congress Committee (MPCC) Sukrobar salo ong·atangaha.
Indakgipa program ko ong·agatani miksonganiara politics o bak ra·nagipa chadamberangko an·antangtangni changa sapanio tang·dodapatna aro mikkangchina tarisamsoe kamrangko ka·na man·agita ong·a.
Ia program o MPCC ni President aro gitcham Deputy Chief Minister Deborah Marak, Congress dol ni National Executive Committee Member Mathew Anthony, Shillong ni Manuel Badwar aro gipin dilgiparangba bak ra·angaha. MPCC ni gipin dilgiparang aro skigiparangba bak ra·ange, Garo Hills ni gipin bakrangoni sokbagiparang baksa agangrikna chol ko man·aha.
Ia training-o dingtang mancha chadamberangni chanchiani bewalrangko apalatna aro dilgipani kamni bidingo skie on·angan baksana mande jinmani mikkango maikai agana nanganirangkoba talatangaha.
