Karnataka-ni Mandya songjinmao donggipa Gokul Educational Institution residential skulni hostel-o bisi gnanggipa cha·anirangko cha·mane sakamgipa bi·sarangko hospital-oni jokani ja·mano rehabilitation centre-ona watatskana district administration tik ka·angaha. Deputy Commissioner an·tangan bang·a official-rang baksa iani bidingo tom·aniko dakange ia ja·kuko ga·na tik ka·angaha.
Ia obostao Meghalaya a·dokni bilsi 12 aro 13 ong·gipa bi·sarang sanna bannaniko dakgenchimoba Robibaro saksa aro Sonibar salo sakgipin janggi galangaha. Hospital-o dongrikenggipa bi·sani gimin Meghalaya-ni re·anggipa dolrang Karnataka State Commission for Protection of Child Rights (KSCPCR) ni Chairman baksa golporimangaha. Obosta ong·anggipa school-koba uamang apsan re·ange niangaha, uni ja·mano KSCPCR-ni Chairman, DC aro gipin official-rang bi·sarangko donenggipa hospital-onaba re·angaha.
Mitam bi·sarang an·seng baljokaniko man·engaha, indioba mitamrang ICU-on dongkuenga. Mandya a·jani official-rang Karnataka sorkarina pakwatgipa report-ko Meghalaya dolna on·a ku·chakangaha. Unbaksana, mokor doma ka·aniko, rim·ani, cha·anini sample-rang aro gipinrangni report-koba on·a ra·chakangaha. Bi·sarangko rehab centre-o donengon, doctor-ni aganagita cha·ani ringanirangko district administration-ni officer-rang nirokanggen ineba parakataha.
