France a·songona re·ange World War I-o bak ra·gipa A·chik matgrikrangko gisik ra·na Tura Babupara-o tarie dongipa cenotaph-ko pe·e dingtang biap tarina am·enganina Mothers’ Union dolrang jegalenba suk ong·gijaniko parakangaha.
Union-ni Secretary Sume G B. Momin-ni agananigitade, cenotaph-ko pe·engani gimin WGH a·jani DC Jagdish Chelani-o March 17 tariko project-ni chu·gimik miksonganiko sing·aha ine u·iataha. Chelani, uni agananio ia a·damko badingchakgipa biap tarina maming chanchia dongja, dal·dape aro namdape tarinasa am·enga ine aganchakaha. Indioba, name am·sandie nion DC-ni agangipa kattarang aro administration-ni miksonganirang dingtanggrikaniko u·iaha.
Tura Municipal Board (TMB) o 2025 bilsini February 24 tariko RTI ka·anioba, DC ni agana baksa chanchigimin kamrang dingtanggrikaha. Ia a·damko commercial biap dake tarina ba miksongani songdonggipa manderangna aro jatna namen gisik sa·dikataniko on·aha. Union-ni President, Sabina K. Sangma, ia a·damko songe donaigipasan ong·aigija jatni bang·a ning·tuanirang aro gisik ra·na kragipatlrang gnang ine aganangaha.
A·damko pe·e commercial biap dakna am·enganiara Garo Hills aro manderangko dal·e ra·gijaniko mesoka. Indakgipa gadango donggipa officer-ni cha·bokaniko ta·raken nirokatna nangenga. Garo Hills-ni manderang kakketgipa aro pilak kamon bakrimaniko am·gipa, namgniko dakgipa dilaniko man·a nanga. Ia biapko commercial dake tarina am·ode dingtang ja·kuko ga·anggen, jatni gisik ra·na kragipa a·damko administration jakkalsretna man·jawa ine Sangma aganangkuaha.
