Karnataka-ni Mandya songjinmao donggipa Gokul Educational Institution’s residential skulni hostel-o bisi gnanggipa cha·anirangko cha·anichi Meghalaya a·dokni sak 2 poraienggipa bi·sarang janggiko galna nangaona sokaha.
Sianggipa chatroara Meghalaya a·dokni West Khasi Hills a·jani Namebantie Marwein ong·a jekon saa bilonganina Mysuru-ni Apollo Hospital ona sannagita rimanggenchimoba janggiko jokatna man·jaha. Apasan daken East Khasi Hills a·jani Lyndem Pynursla ni Class VII-o poraienggipa bilsi 14 ong·gipa chatro Khrehlang Khongtani ba ia cha·aniko cha·e March 17 tariko janggiko galangaha. Uamangna agreba ua hostel o donge poraienggipa sak 24 bi·sarangba ia cha·aniko cha·e bilongbee saknaako man·ani gimin hospital o sanna bannaniko dakangenga.
Kobor rangko man·soanigitade, ia hostel ko skulnigita niamgri chalaienga ine u·ina man·an baksana poraienggipa bi·sarangna batanggimin Holi maniani salo songe gitchagipa mi bijakrang on·angaha.
Ia skulko niamgita chalaigenchimoba, hostel ko chalaina uamangna dingtang mancha maming hukumko on·jachim ine police dolrang u·iatangaha aro ia hostel o dongenggiparang bang·bataan ma·gri pagri rangsa ong·a ine parakangaha. Ia a·sel ong·anio da·o dipet hostel ni nokgipa Siddaraju, skulni secretary/headmaster Lankesh aro hostel in-charge Abhishek ko police rang pattoko donataha.
Ia a·sel obostani bidingo name dake ma·sie ra·na Karnataka ni Education aro Health department ni officer rang ua skulni hostel ona re·ange am·sandianiko dakangenga.
Meghalaya sorkari dingtang mancha Commissioner & Secretary (Home) Cyril Diengdoh, Sub Inspector of Schools, Sub Divisional School Education Officer, Shillong ni P. Sunnaro District MIS, PM – POSHAN, Shillong ni R. Kharsyntiew ko watate Karnataka ni district administration baksa gronge ja·pang ja·dil ko ma·sie ra·anggen. Unbaksana Meghalaya a·dokni ua skulo poraienggipa bi·sarangni ma·gipa pagiparangkoba watataha.
A·dokni health department ba ia obostani bidingo chu·gimik u·iatna nanganiko aganangaha.
