Da·al salni bakko Dadenggre Sub-Division ona re·gipa Ringgi chibimako RCC dolong kabatnagita Meghalaya Industrial Development Corporation (MIDC) ni Chairman James PK Sangma Dadenggre Little Flower school-o tom·bimonganio pangchakani ro·ongko songe on·angaha. Tom·aniona GHADC-ni MDC, Taxation aro Water Works ni EM Grahambell A. Sangma, Principal Fr. Nicholas Marak, Nokma, Sordar, songni dilgiparang aro manderang program-ona sokbatokaha. Unbaksa, PWD Dadenggre Division-ni Executive Engineer Ezian Sengba K. Sangma aro department-o kam ka·giparang bakko ra·angtokaha.
Ia dolong Government of Meghalaya, Public Works Department (Roads) nigita CRIF ni ning·o 2021-2022 bilsio tikatgipa project ong·a.
MIDC Chairman James Sangma program-o aganengon, skanggipa a·dokni Chief Minister Conrad Sangma-ko ia dolongna kamrangko a·bachengatna gong Cr 9 tangkarangko chamatahanina kattarangchi mittelangaha. Batanggimin salrango wachi karirango chi banna ong·e manderangni dal·a neng·nikanirangko chagrongako nike dolongko tarina ru·uta somoirangonin kam ka·aha aro da·o bimang ong·nasienganina katchabeaniko Sangma parakangaha.
Uni bebe ra·anio Sangma an·tangko Dadenggre songoni gitaan chanaha ineba social media-o janapataha. Unbaksana, Dadenggre aro wilwilao donggipa songni manderangna ia dolong jakkaltobegipa ong·gen. Ian sorkarini mikkang nitegija aro ku·chaka baksa kam ka·enganiko mesoka ineba Sangma parakataha.
