College of Community Science, CAU (Imphal), Tura campus-o misiko ge·ani bidingo “Challenges and Opportunities in Millet Cultivation – NER Perspective” ine katta bichongko donenba regional workshop-ko ong·ataha. Ia workshop-ko ong·atna CAU Tura, AICRP on Sorghum & Small Millets, ICAR-IIMR, Hyderabad baksa bakrimaha.
Workshop-o bang·a u·i ma·sigiparang, sandirikitgiparang aro jolo donggipa dingtang dingtang ge·e game cha·giparang sokbatokaha jeon uamang misi ge·anio neng·nikani aro cholrangko namdapatani bidingo chanchirimangaha. Ia workshop-ko misi ge·aniko NE a·jarango tang·doatna unbaksana uni namgni aro ge·togipa biap ong·aniko ma·siatna ong·ataha. Workshop namen chu·sokgipaba ong·aha jeon chu·gimik sak 150-200 mang manderang sokbae bak ra·angtokaha. Ia somoio entrepreneur rang aro policy maker-rangba sokbatokaha.
Program-ni a·bachengao college-ni Dean, Prof. Jyoti V. Vastrad, misi ge·ani gamchataniko aganangaha. Misi rokkomsa je somoi kariko nigija aro neng·nikanirangko chakna man·gipa ong·a ine Dean aganangaha.
Workshop-ona sokbagipa sapgiparang an·tangtangni am·sandie u·i ma·sigimin aro misi ge·anio dake nike chagronganirangko talate golporimangaha. Uamang, misi ge·aniko namdapatna, technology-ko jakkalna, gital cholrangko ra·dapna, palaniko baridapatna aro gipinrangko chanchirimangaha. Iasan ong·aigija uamang North East Region (NER) rango misi ge·aniko baridapatna bang·a cholrangko parakangaha. Uarangoni jekai research & extension service-rangko bilakdapatna, bitchilrangko simsakaniko namdapatna aro badinganiko antirango tang·doatna ku·pattiangaha.
Jolni misi ge·e game cha·giparang ia somoio an·tangtangni neng·nikanirangkoba parakangaha. Unbaksana, uamangni ge·a gamaniko namdapatna nangnikaniko jekai rokkomanti bitchilrangko bariatna, chi watatni cholrangko aro badinganio antiona biterangko sokatna dakchakaniko janapangaha.
