Sports-ni a·bao me·chikrangni bak ra·aniko bariatna ‘Promotion of Sports Among Women’ katta bichongko donenba ASMITA Open Table Tennis City League-ko Tura Hawakhana Indoor Hall-o mijal salo ong·atangaha. Ia susaaniko Office of the District Sports Officer, Directorate of Sports & Youth Affairs aro Khelo India Centre bakrime ong·ataha.
Katta bichongna krakra ia tournament-o chadambe me·chik bi·sarangko didianiko on·aha aro uamangni gisiko nange bak ra·aniko nikangaha. Ia tournament-ko dingtang mancha sports-ni a·bao me·chikrangko tang·doatna aro susaani bewalko ra·bana miksonge ong·ataha. Tournament-o chu·gimik sak 30 mang bakko ra·angtokaha jeon singles aro doubles category-rango susaataha. Che·giparangna adita tangkarang baksa medal aro certificate-rangkoba on·angaha.
Doubles category-o skanggipako Brooke Jakmikse K. Marak aro Aara Niamca Ch. Momin cheangaha. Gnigipa biapko Azaniah D. Marak aro Ayshe Annora S. Marak, uandake gittamgipako Genesis D. Sangma aro Clea Phelicia S. Marak man·angskaaha. Singles category-o skanggipako chegipa Brooke Jakmikse K. Marak, gnigipako Aara Niamca Ch. Momin aro gittamgipako chegipa Ayshe Annora S. Marak ong·skaa.
Tournament-ko ong·atanio bang·a me·chik chadamberangni gisepo gisik nanganiko nikangaha jemangan dal·a gadangrango susana bil amnagiparang ong·a. Sakanti bakko ra·anggiparangan chu·bata gadangona sokdona sikgiparang aro state level ona gadoangna cholko am·giparangba ong·a.
