Da·al salo Tura Christian Hospital-o, “Are Your Kidneys OK?” ine katta bichongko done World Kidney Day-ko maniangaha. Ia manianio pilak bilsini manderangna ka·rongterangko koros nanga gri porikka ra·e nianiko dakangaha.
Screening camp-ko pring 10 bajioni 2 bajiona registration ka·anio sak 189 mang manderang an·tangtangni bimingrangko segatangaha. Uamangko ka·rongtekosan ong·aigija blood pressure, blood test aro gipinrangko koros gri porikka ra·e niangaha. Unbaksana, ku·pattie on·anirangkoba hospital-ni nephrologist dolrang dakangjolaha.
Camp-ko ong·ataniara ka·rongterangko an·seng baljoke donganiko ma·siatna, da·ororo ka·rongte sa·anirang batroroenganina uarangko senggnang porikka ra·e nianiko dakchina manderangna ka·donganiko on·a miksonge ia awareness program-ko ong·atangaha ine hospital official aganangaha. Kidney day-o manderangni bakrimanichi ia salko maniani namen chu·sokgipa ong·aha. Saksa songdonggipa, koros gri porikka ra·na man·ani gimin, ia namgipa cholko on·anina department-ko mittelangaha.
