North Garo Hills-ni District Selection Committee (DSC) na LDA cum Typist aro gipin kamrangna mikkang nitegija aro ta·rakale kamna rimnapaniko dakchina Rongrong-ni MDC Rinaldo K. Sangma NGH-ni Deputy Commissioner ko mol∙molataha. Iako janapengon, maming mikkang nitegija seokani cholko dakna gipin a·jarango ja·rikagita porikkako segipa chadamberang Optimal Mark Recognition (OMR) system ko jakkalna man·jae uamangni answer rangko question paper on sena nangskaaha aro gipin a·jarangna skangan porikkako seatgenchimoba North Garo Hills District Selection Committee da·onaba result ko nakatatkuja ine u·iatangaha.
Batanggimin somoio gitcham DC na DSC-ni Vice Chairman saksa MLA ni depante ong∙ani gimin NGH-o songdongenggipa chadamberang ja∙manchi kamrangna rimnapanio kakketgijagipa cholrangko jakkalangna kensoaniko Sangma janapangaha. Iako aganengon, politics-nigita noktangoniko indakgipa gadangni kamrango seokanichi pilakande kakketgijagipa kamrangko ka∙rongja ine Sangma aganangaha. Indake ong∙genchimoba bang∙bata somoirangon bilrangko jakkalsretanikoba nikna man∙skaaha jean Prevention of Corruption Act-ko pe∙ani ong∙a ineba Sangma agandapangaha.
Bang∙bata changon dal∙dalgipa manderang baksa maming meligrikani ba bak dongjagenchimode, gisiko nanggipa aro man∙a kragipa chadamberang kamrangko man∙rongja ine aganangaha. Indakgipa obosta ong∙aoniko champengnagita nanggipa ja∙kurangko de∙e maming mikkang nitegija kragipa bewalo kamrangna rimnapaniko dakchina Sangma didiangaha.
OMR ko jakkalgija chadamberang jaktangchisa sing·anirangna sena nanganiara maio pangchake ja·ku de·angaha aro result rangko da·onaba parakjani ja·pangrangko sing·doan baksana DSC-ni Vice Chairman saksa MLA ni depante ong∙e maikai kakketgipa bewalo district administration result rangko parakna miksonganiko Sangma uni namnikgijaniko aganangaha. Ia pilak kamrangko name mancha nirokaniko dake kragipa bewalo aro mikkang nitegija result rangko ta·raken parakatchina didiangaha.
