Rel gariko South Garo Hills a·jani Baghmara songjinmaona bakrodapatna batanggimin salrango SGH ni MLA rangni dabiani bidingo ma·mong sorkari baksa golpogrikange chanchirimanirangko dakanggen ine Chief Minister Conrad K Sangma Budbar salo ka·dongatani kattarangko parakangaha.
Iako aganengon, skanggipao sorkari nigita manderang baksa golpogrikchenge uamangni nangnikani ba nangnikgijanio pangchakesa iani bidingo mikkangchi ja·ku de·angna man·gen ine Sangma aganangaha.
Rel gariko ra·baani bidingo manderangni maidakgipa chanchianirang donganiko nirokchengna nanggen aro bebe ka·e ia project ko jinma namnike maming jechakani dongjagenchimode mikkangchi ia rel gariko ra·baanichi kajina man·aniko bariatan baksana game ge·e cha·giparangna aro bading chiwalenggiparangna bang·a namgnirangko ra·bana dakchakanggen ine Chief Minister aganangaha.
