Songadamrango job card donggipa manderangna on·a nanggipa tangka paisarangko a·dok sorkari on·kujaengani gimin BJP dolni dilgipa aro Tura MDC Bernard Marak a·dok sorkariko matnangataha. Job card-na ma·mongoni 90% aro a·dok sorkari 10% ko gamna nanga jekon Marak-ni agananigitade ma·mong sorkari on·atmanaha ine a·kange parakataha. Indake ong·genchimoba mittam songni manderangko ma·mong sorkarikosa tangkarangko on·atgija cha·bokenga ine altuaen bebe ra·atenga, indioba a·dok sorkarisa block-rangona tangkarangko chamatjaenga ine Marak aganangskaaha.
A·dok sorkari block-rango kam ka·ataniko somoigita watatna aro matchotatna nanga jeon bill-rangko on·manahaon sal 15-ni gisepon gamna nanganirangko bon·atna nanganiko BJP dilgipa u·iataha. Block-rangba bill-rangko somoigita joma ka·aniko nirokna nanga, indioba uni nikanio bang·a bill-rangko jekai re·anggipa bilsioni bill-rangkon online update ka·a donggijaniko nikna man·enga ine Marak aganangaha. Bang·bata manderangkon muster roll-rango absent segatenga ineba Marak agandapangaha. Unbaksana, ma·mong sorkariko maming cha·bokani dongjanagita tangkarangko watatani ja·manosa kamko ka·na ge·etna nanga jekon block-ni nirokna nanganiko ua janapataha
Bang·a VEC-rang manderangni seoka man·gija appoint ka·gipasa ong·ani gimin NREGA-o job card man·giparangni dingtang dingtang neng·nikanirangko nikchange jrip dongtokenga. Indake dakengon uamang sinjetaniko man·enga aro man·na nanggiparango kakket ong·jaenganiko Marak parakataha. Somoigita gamna nanganirangko man·sojae sing·doenba bang·a songrangoni janapatokenga aro re·anggipa bilsioniba gamna nanganirang dongkuenga ine ua parakata. Iarangna sing·sandianiko dakon a·dok sorkari nanggipa tangka paisarangko block-rangona watatkujaenganiko ma·sina man·aha ine Marak u·iataha.
