University of Science and Technology Meghalaya (USTM) ni kosako Assam-ni Chief Minister-ni matnanganina Meghalaya CM Conrad Sangma chakpaani on·atenba university-o pakwatenggipa degree-rangko kakketgipa ong·a ine aganangskaaha.
USTM-ni Chancellor Mahbubul Hoque-ko re·anggipa February 22 tariko school ge·sao porikkani somoio kragija kamrangko ka·aha ine matnanganiko man·ani ja·mano Assam-ni Sribhumi police dolrang rim·aha jekon USTM dol chalaienga aro ia foundation-ni Haque Chairman-ba ong·a. Sangma, Haque-ko rim·ani bidingode agana jechakaha. Iani bidingo Hoque an·tangan aganchakna nangen aro ua uni palo aganchakna niam ong·gijaniko parakangaha. Education Minister Rakkam Sangma-ba, Hoque-ko rim·aniko USTM-ko chalaianio maming bak dongja ine battanggimin chango aganangaha.
Indake ong·genchimoba a·dokni Chief Minister, pilak permission aro nanggipa document-rang kragipa bimangon donga aro maming ong·gija dakani dongja ine parakangaha. USTM pangna bilsian degree aro certificate-rangko pakwatenga. Iani bidingo manderangoniko, official aro poraianggipa chatro chatrirangoniko sing·e ra·china Sangma aganangaha. Uamang USTM-o nambatsranggipa rika cho·anirang, staff-rang, chu·ongagita kam ka·giparang aro poraitogipa biap ong·aniko agane on·a man·gen jean a·dokni chadamberangna bidani a·bao USTM dal·a on·gilaniko dakenga ine Sangma aganangkuaha.
Meghalaya a·doko USTM-gita dakgipa university dongani gimin kusi ong·anikoba Chief Minister Conrad Sangma parakangaha. Da·o adita neng·nikanirangko man·genchimoba aro a·bachengao chu·gimik permission-ko ra·na man·jae ja·guaniko chagrongoba USTM-ko chalaina man·anina kusi ong·a aro maming ong·gijanirang dongja ine Sangma agandapangaha.
