Meghalaya a·doko dam gni biaprango railway project jean km 22 ong·gipa Tetelia oni Byrnihat ona aro km 108 ong·gipa Byrnihat oni Shillong ona tarina amgipako bang·a manderangni jegalsoani a·sel ma·mong sorkari ia project rangko ra·galna miksonganiko parakataha.
Kobor ra·timgiparangna parakatengon, ia project na nanggipa a·a rangna chamatgimin gong 300 crore ko on·pilchina a·dok sorkariko ma·mong sorkari ge·etangaha ine Chief Minister Conrad Sangma Budbar attamo parakataha.
Ma·mong sorkarinigita ia Byrnihat oni Shillong ona tarina amgipa railway project na chamatgimin tangkarangko on·pilchina ge·etgimin chitti ko man·soaha maina ma·mong sorkari a·dokni rai on·ako jringrotna sengdamna man·jawa ine Sangma aganangaha.
Ia railway project ko Shillong o bimang ong·atna namen neng·begen maina ma·mong sorkarinigita chamatgimin tangka paisarangko on·pilchina ge·etaha ine aganan baksana manderangni nangnikanio pangchake East Jaintia Hills ba a·dokni gipin biaprangona ia railway project ko mikkangchi ra·bana ja·ku de·na man·gen ine Sangma agandapangaha.
Iani bidingo manderang baksa apsan tom·aniko dake chanchirimna miksonganikoba CM parakataha. Batanggimin sal somoirango bang·a manderang baksa dingtang dingtang gadango golpogenchimoba ia project rangko jechaksoanikosa man·batronga ine Sangma parakataha. Mittam manderangni railway project ko ra·bana miksonganiko namnike ra·chakanikoba nikangna man·genchimoba jinmani namnikanio pangchakesa ja·kurangko de·na man·gen ineba Sangma janapangaha.
