JHADC election-na pu·onnani somoio East Jaintia Hills, Wapung Skur-o polling station ge·sako ma·sina man·gijagipa manderang re·baenba EVM-rangko nosto ka·e donangaha.
EJH Superintendent of Police, Giri Prasad-ni u·iatanigitade ia obosta pring 11:30 mang bajirango ong·aha ine parakataha. Koborrangko man·a bikan EJH a·jani Deputy Commissioner Shivansh Awasthi aro SP a·damona re·ange nieha. Manderangko naljokatnagita aro a·selrang batrorojachina polling station-ona police dolrangkoba watdapataha ine SP u·iatangaha.
Ia a·selo darangba saknaaniko man·jaha aro manderangkoba simsake dongchinagita SP mol·molangaha. Denggu dakgipa manderangni kosako nambate u·inagita sing·sandiani aro am·sandianirangko dakangenga ine SP parakataha.
