Delhi-ni gital Chief Minister ong·e kamko ka·angna BJP-ni Rekha Gupta da·al salo Delhi songjinmani Ramlila Maidan-o ku·mikchetangaha. Gupta baksa cabinet ni sakdok ka·rimskarangba ku·mikchetaniko dakangaha. Ian Rekha Gupta ni skanggipa changna Shalimar Bagh constituency o MLA na seoka man·chenggipa ong·a.
Batanggimin sal somoirango Delhi election na susaanio BJP dolrang seat bang·bate cheanichi Delhio gital gipa sorkariko rikna bilsi 26 ni ja·mano cholko man·taiaha. Arvind Kejriwal ni dilanio AAP dolrang re·anggipa bilsi 10 na batpile Delhi-ko sason ka·anggenchimoba, ia chango uamang chu·ongagita seat rangko man·jae opposition dolo donge kamrangko ka·na nangao sokaha.
