Meghalaya a·doko chang 39-gipa National Games-ko 2027 bilsio ong·atna Olympic Association aro ma·mong sorkarini tik ka·ataniko Sports & Youth Affairs Minister Shakliar Warjri parakataha.
National Games-ko sokachaknagita gitcham Chief Minister Dr. Mukul-ni dongmitingo 2018 bilsio IOA baksa songgigrikaha jekon 2022 ong·atna miksongani gnangchim. National Games-ko Covid 19-ni a·selo ong·atna man·jaha aro bang·a neng·nikanirangko man·e ja-bilsirangko ra·doatna nangao ga·akaha. Indake ong·genchimoba, re·baenggipa 2027 bilsio National Games-ko sokachaknagita IOA aro ma·mong sorkari re·mikkangchina ge·etataha ine Sports & Youth Affairs Minister u·iatangaha. Ia kattarangko ua uni social media page-o parakataha.
Ian a·dokni chadambe sports-na gisiko nanggiparangna namgipa kobor ong·a aro ia cholko ra·e National Games-o medal-rangko chena raken jotton ka·anggen ine ka·dongsoaniko Warjri aganangaha. Iani bidingo Warjri, re·anggipa bilsini December jao ma·mong sorkarini Youth Affairs & Sports, Mansukh Mandaviya-ko grongangaha. Uni kan·dikgipa video-o ua Uttarakhand-o ong·enggipa chang 38-gipa National Games-o Meghalaya a·dokni sak bonga medal man·giparangnaba namgipa skaniko on·angjolaha.
