South Garo Hills, Alagri Community Health Centre (CHC) o chagrongenggipa bang·a neng·nikanirangko nirokatchina Rimrangpara aro Sangkinegri Deku Circle-ni FKJGP dolrang Chokpot ni MLA Sengchim N Sangma-o mol·molangaha.
Alagri CHC-ko NGO dolrangni re·ange nirokeaniko dakon bang·a namdapatna nanganirangko nikange u·iataha. Skanggipa-o Alagri CHC-o donggipa ambulance gari bolgnian nosto ong·ani a·selo galchipe dona nangao ga·ake nangan somoirango sagipa manderang sakgipini garirangkosa para ra·e CHC-ona re·bana nange songdongenggipa manderang bang·a neng·nikanirangko man·enga ine NGO dolrang aganangaha. Gnigipa-o chirangko chu·onga gita man·jae CHC quarter-o dongkame kam ka·giparangna aro CHC-ona sanna bannaniko ra·na re·anggiparangba neng·nikanirangko man·enga.
Gittamgipa-o CHC ning·ao bijoli-ko nirokgipa aro tarie on·timgipa dongjae nosto ong·an somoirango bang·a neng·nikanirangkoba man·a nangenga. Brigipa-o compound-ni ning·ao donggipa pakmako a·a bedapanichi jimbee mikka wa·ani somoio drain ba nalagita chirang jokangna man·jae nok ningarangona napanichi, kam ka·giparangna aro sanna bannaniko ra·na re·bagiparangnaba namen neng·nikarangko on·enga ine NGO dolrang janapangaha.
Bon·kame, CHC-ni ning·ao network rang namjae sagipa dinggiparang ta·rake sanna bannaniko ra·na Doctor aro nurse-rangnaba kobor-ko on·atna man·gijanikoba aganangaha. Ia pilak neng·nikanirangko ta·rakkale nirokatchina gita Deku Circle FKJGP-ni President Grimbal Ch Marak, MLA Sengchim N Sangma-o mol·molangaha.
