Budbar salo Meghalaya a·doko cancer sabisiko man·giparang bang·rikrikenganiko Indian Council of Medical Research (ICMR)-ni u·iatani gita a·doko lakh prak mande jelanion sak 176 manderang cancer sabisiko man·giparang ong·enga ine Health Minister Ampareen Lyngdoh parakataha.
A·dok sorkari cancer sabisi baksanaba da·ororo manderangni saanirangko man·batenggipa jekai hypertension, ka·rongte aro bika sa·aniko man·giparangko nambate sanna bannaniko on·a gita rake kamko ka·angenga ine Lyngdoh aganangaha.
Re·anggipa 2024 bilsio Shillong civil hospital ge·sanon sak 8,382 mangnigita a·dok a·paloni cancer sabisiko sanna re·baaniko nikna man·e sak 50 chakgipa palangko sak 90 ona bariataha aro mikkangchi sak 200 manderangna chakgipako tarisamsoan baksana adita doctor-rangko an·tangtangko tarisamsoe tiktak ong·e skie ra·aniko dakna gitaba watatenga, jedakode a·dokona re·bapile nangan somoio kamrangko ka·angna man·gen ineba Lyngdoh aganangaha.
Cancer sabisiko sannaniko dakna sorkari North Eastern Indira Gandhi Regional Institute of Health & Medical Sciences (NEIGRIHMS) hospital baksa bakrime kamko ka·na miksonganikoba Lyngdoh aganangaha.
Tangka paisani gita neng·nikaniko man·gipa manderangko NEIGRIHMS ona sanna bannaniko dakna watatna u·iataniko on·enga. Chela biaprangchi re·anggija a·doktangon cancer sabisiko sanna bannaniko ra·na man·gen, unbaksana dingtang dingtang sanchakram biaprang jekai Guwahati Medical College (GMC), Barwa Cancer Institute aro North East Cancer Institute-rang baksaba cancer sabisiko komia damo sanna nangrime kamko ka·angenga ine Health Minister Ampareen Lyngdoh aganangaha
