East Garo Hills, Rongalgre songo Jal Jeevan Mission (JJM) project ni bidingo Public Health Engineering (PHE) department-o Right to Information (RTI) ka·anio bang·a pipe rangni gimaaniko rim·a man·aha ine Garoland State Movement Committee (GSMC) ni General Secretary Tony Tojrang B Marak parakangaha.
Ia project ni kamrangko matchotgijaan jako ra·gipa contractor aro officer rang tol·pinike completion report ba project ko matchotataha ine parakataha. Iani bidingo PHE department na badi ka·dogenchimoba uamangni kosako maming ja·kuko de·jani a·sel, GSMC dolrang Ranib Marak (JE in-charge), SDO Tengchrang G Momin, Sujeet Marak aro NEDFI ni kosako FIR ka·doangaha.
Kam ka·aniko matchotgijaan signboard rangko songaniara manderangna tol·pinike mesokani ong·an baksana songni Headman aro Secretary rangko ia project-o bak ra·atgijaniba kakketgijaniko mesokenga ineba uamang aganangaha.
JJM nigita je pipe rangko chate on·gipanikoba Rongalgre songni manderang da·o dipet chirangkoba man·kujaenga aro chu·gimik piperangkoba chate on·kuja ine GSMC matnangataha. Ia pilak kamrangko niate FIR ko ka·doe nanggipa ja·kurangko de·e name dake am·sandichina GSMC dolrang Chiading Police Station ni in-charge na chitti see mol·molangaha.
