Meghalaya Hajong Welfare Association (MHWA)-ni South West Garo Hills Purakhasia-o salgnina ong·atgipa chang gittamgipa Annual Conference name matchotangaha.
Conference-ni bon·kamgipa salo a·dokni Chief Minister Conrad Sangma mongsonggipa ong·e sokbaaha. Unbaksa gipin dilgiparang chong·motan Salmanpara MLA, Ian Botham Sangma, Mahendraganj-ni MLA Sanjay Sangma, Rangsakona-ni MLA Subir Marak, Babelapara-ni MDC Rakesh Sangma, SWGH-ni Deputy Commissioner Hema Nayak, SWGH aro WGH a·jani gipin official-rangba sokbatokaha.
Tom·anio MHWA, Chief Minister-na bang·a nanganirangko janape memorandum-koba on·angaha. Uamang a·dokni reservation quota-ko 5% ona ra·doatchina mol·molaha. Meghalaya a·doko brigipa jat jelbatgipa ong·e da·o ja·rikenggipa quota-ko gipin chonchongipa jatrang baksa sualna nange chu·ongja ine aganangaha. Minggipin nangnikanirang jekai bida budi ra·anio man·gnirang, dakarikaniko naljokatna, janggi tangani cholrangko ra·bachina, Hajong-rangni songdonggiparango rika cho·ani rama jal·langrangko namdapatchina aro bang·a gipin nanganirangko memorandum-o janapangaha.
Chief Minister Conrad K. Sangma, Hajong-rangni a·dokni tang·doanina on·gilanirangko mande ra·e aganangaha aro uamangni nangnikanirangko chu·sokatna ku·chakangaha. Sangma, Chief Minister’s Assistance Scheme-ni ning·o gong lakh 25-ko on·e girls’ hostel-ko matchotatna parakangaha. Uamangna ambulance-ko on·a, jal·lang ka·sotna tangka chamatna aro gipin chu·sokatgijagipa kamrangni bidingo MLA-rang baksa agangolpogriknaba ku·chakangaha. Kilding dokgipa Hajong ma·giparangna ua dingtang dingtang cholrangko ra·bae namdapatnaba parakangaha.
Salgnina ong·atgipa ia conference, Hajong-rangni dakarika, jatni dakmesokanirang, chrokmesaani aro doka dam·aniko maniani ong·a. Ia manianio Hajong-rangni silchidarerang, babilsini bosturang, model nokrang aro bang·a jatni bak rengsirangko mesokangaha.
