West Garo Hills ni Police dolrang cha·ugipa manderangni kosako am·sandianiko dake bike bol 17 baksa cha·ugipa manderang sak 4 ko aro ia kamko ka·na ge·etimgipa mongsonggipa mandeko rim·na man·aha.
West Garo Hills a·jao bike cha·ugiparangni kosako am·sandianiko WGH (Sarsar) ni CI aro Tura PS ni Officer In-Charge ni dilanio Assam ni baksa bakrime kam ka·angaha. Police dolrang ia kamo mongsonge bak donggipa mande jean Balsrigittim, Raja Apal PS: Bajengdoba ni bilsi 32 ong·gipa Jamesmond K. Marak ba Simon ine minggipa baksa sakgittam manderangko rim·na man·aha.
Sakgittam rim·a man·gipa manderangara East Garo Hills, Jamge (A), Songsak ni bilsi 28 ong·gipa Tengwal R Marak, East Garo Hills, Rongchek Apal, Songsak ni bilsi 31 ong·gipa Jangkal B Marak aro East Garo Hills, Dosikgittim, Mangsang ni bilsi 33 ong·gipa Judistil T Sangma ong·a jean batanggipa sal somoirangoba adita bikerangko cha·uanina pattoko dongenchimoba uamangko bail ka·ani ja·manan indakgipa apsan kamko ka·angtaiaha ine parakataha.
