Government Girl’s Higher Secondary School, Jail Road, Shillong-o poraienggipa bilsi 16 ong·gipa class XI-o poraienggipa me·chik bi·sa school-ni skichakgipa kutturio an·tangko kae siaha. Ia obosta re·anggipa January 24-o ong·aha jekon police-rang mijal salo a·selko name talatangaha. Sianggipa bi·sa gisiknigita chanchisokgija bilgrie dongenggipa ong·a ine ma·sina man·gen. Ia ja·kuko ga·na skang ua suicide note-oba an·tangni neng·nikani aro duk man·ani gimin see donangaha.
“People say problems will disappear or resolve, but in reality it does not happen”, ian uni suicide note-o bon·kame see donanggipa kattarang ong·a. School-ni skigipa, ripengska aro police-rangni agananigitade, sianggipa bi·sa uni porikkani bon·kamgipa salo an·tangni janggiko ra·aha ine parakataha. Uni manggisiko post mortem ka·e porikka ra·an ja·mano ma·apana pakwatangaha.
Ia apsandakgipa a·selrang re·anggipa changrangoba ong·angaha mongsongbate chadamberangni gisepo ong·rongbata. ‘Depression’ ba chanchisokgijani, ian dal·bea aro namjabegipa gisikni sabisi ong·a. Ia indakgipa bi·sarangna dingtang mancha dakchakaniko, ku·pattianirangko on·a ba counselling-rangko nanga. Uamangko seng·gnang u·ie naljoksona man·agita sakanti ma·apa, ripengska aro songsalni daitoan ong·a, je somoio chanchiani ningtuanggenchimode ian dakgipa ja·kurangko ga·aona sokataha aro janggirang indin bon·gramaona soka.
