West Khasi Hills a·jani Gillagora song jean Bangladesh a∙songni sima ari jol aro gipin a·jarangni sima ari jolrangrang gita Bangladesh a·songni manderang niam gri napdrabaenganirang batrikrikbaengani a·sel South Garo Hills Nongalbibra Regional GOERA dolni President aro Secretary, Meghalaya a·dokni Home Minister ko ong·enggipa obostrangko nirokatpachina mol∙molangaha.
Adita salrangna skang Bangladesh ni manderang Meghalaya a∙dokona nengrabee napdrabaanikio Social Media nikna man·aha. Indake uamangni India a∙songni sima arigita maming champengagri napna man∙anian aiao inmanpilgipa ong∙enga ine GOERA dol janapataha.
Border Security Force (BSF) rangna sima ari jolrangko nirokchina daito on∙genchimoba indakgipa obostarangko champengsona man∙janian uamangni kamtangko name dake nirokjeanga ine nikna man·enga. Indake India a∙songona niam gri napdrabaenganiara namen ken∙beani ong∙enga ineba uamang janapataha.
Ia obostarangoni naljoke rakkichina sima ari jolrango aro mongsongbate Gillagora songo BSF dolrangrangko baridapatna mol∙molangaha. Iasan ong∙aigija sima ari jolrango ong∙gipa obostarangko nambate u∙ina man∙agita CCTV camera rangko done, napsrukbagipa manderangko ta∙rake rim·e a·songtangchi watatpilchina aro kamko niroke ka·gijagipa BSF rangko raka sastiko on·china chittio janapataha.
A·songo tom·tomaniko ra·bana ra·ka ja·kuko de·na nangchongmotaniko aro sima ari jolko name dake nirokna nanganiko GOERA dolrang aganangaha.
