West Garo Hills, India-Bangladesh sima ari jolo donggipa Hallidayganj songoniko India-ona niamgri napsrukbana jotton ka·enggipa sak 8 manderangko Meghalaya police dolrang mijal salo rim·na man·aha. Rim·a man·gipa sak 8 Bangladesh-ni manderang Mitapukur and Sabar (Habra)-oni ong·a.
Uamangni bimingrangara Pappu Sheikh, Alif Mal, Masirul Ojha, Arif Sheikh, Maherul Khan, Alif Mondol aro me·chik sakgni Dalia Ojha aro Jhorina minggipaba dongpaa. Police-rang uamangoniko gario gatchape ra·angenggipa tanggipa chipu manggniko man·aha jekon wildlife department-na ja·mano pakwatangaha.
Bangladesh a·songoni India-ona Dalu jolgita napsrukbaaniko batanggimin salrangonin kobor man·soe police dolrang am·sandianiko dakon Hallidayganj songoniko ia manderangko rim·na man·aha. Uamangni kosako nanggipa ja·kurangko de·e police dolrang mokordomakoba ka·doangaha aro sing·sandianirangko dakangkuenga.
