SWGH, Rangsakona PHC-ni ning·o man·gipa Sonamite songo 100 Days Campaign-ko da·al salo District TB Centre ong·atangaha. Camp-ona sak 130 mang manderang bakko ra·angtokaha.
Tom·anio, Dr. Riksilchi Sangma, sokbagiparangko rimchaksoenba TB biati saani chin, saatgipani ja·pang aro naljokani bidingo mikrakaniko on·angaha. Sangma, 100 Days Campaign-ni bidingo aganange manderangna gamchatgipa ong·anikoba parakangaha. Ia campaign-ni miksonganiara sanna bannaniko namdapatna mongsongbate bilsi 60-na batgiparang, jemangan saa man·a altugiparang jekai diabetes, HIV aro gipin biatirangko man·giparangna ra·bagipa ong·a ine Sangma aganangaha. Ua manderangko Nikshay Mitra ong·chinaba didiangaha.
Program-ona, Rangsakona Constituency-ni MLA Subir M. Marak mongsonggipa ong·e sokbaaha. Ua dingtang mancha, pilak manderangko department-ni on·enggipa cholrangko ra·china didiangaha. Unbaksana, ua sakantikon TB sabisi man·a altugiparangko saaniko rim·a man·a District TB Centre, Tura baksa bakrimchina aganangaha. Ua program-o aganengon, sanna bannani a·damrangko namdapatnaba parakangaha. Ua DTC-koba mittelan baksa sakantikon Nikshay Mitra ong·e TB saenggiparangko galongija chakpaaniko on·china mol·molangjolaha.
