South West Garo Hills Ambari songni State Highway 12-ni sepango donggipa ita so·chakgipa biapo saksa bilsi 32 ong·gipa Md. Akhtar Hussain ko pekatgipa bosturang baksa South West Garo Hills Police dolrang rim·na man·aha.
Pekatgipa bosturang baksana Yamaha FZ bike (Registration number AS 17 J 2814) ge·sa, ge 992 yaba tablet (methamphetamine) aro ge·gni sabon ni box rango 19.21 gram ni heroin chipgipako man·aha. South West Garo Hills Police ni am·sandie nirokagita indakgipa pekatgipa bostu palgiparangko champenge songsalko tom·tomaniona ra·bana kam ka·ani ong·a.
Rim·a man·gipa mandeko aro man·gimin bosturangko niam ni gita jako ra·anggen aro sal gittam na police custody o donanggen. Ia mande baksa pekatgipa bosturangko badinganio gipin bak donggipa manderangkoba am·sandianggen ine u·iataha.
Batanggimin 2024 bilsio South West Garo Hills Police ge 12 case rangko segate dona man·aha aro sak 17 pekatgipa bostu palgiparangko rim·na man·e chu·sokaha.
