Meghalaya aro Assam sima ari jolo donggipa Rongsai Forest Beat Office jean Tikrikilla Police station ni ning·o ga·akgipako ru·uta bilsirangna galchipe donanina Pedaldoba Sub Unit ni A·chik State Peoples’ Front (ASPF) GHADC ni Forest department in-charge ko taridape on·china mol·molataha. Ia Forest Beat Office horticulture aro forest ni bosturangko Assam ona ra·angna mongsonggipa rama ba re·sotna nanggipa ong·a ine ASPF dolrang janapataha.
Ia office ko galchipe tarichipgija donani a·selo aro kam ka·giparangba dongjani gimin chu·gimik bilo kamkam ka·na man·agita ta·rake nirokatchina uamang didiataha. Ia office o kam ka·gipa manderangko rakkianichi bosturangko niamni a·palo salruraanirangkoba nirokatna dakchakanggen ine aganan baksana Garo Hills Autonomous District Council (GHADC) na kajina ra·baaniko bariatgen ine ASPF aganangaha.
