Da·al salni bako, WGH Tura District Auditorium-o West Garo Hills-ni class 11-o poraienggipa chatro chatrirangna, CM’s Student Digital Learning & Scheme-nigita M-Tab rangko a·dokni Chief Minister Conrad K. Sangma-ni jakchi sualangaha.
Ia tom·bimonganiona a·dokni Chief Minister Conrad K. Sangma mongsonggipa ong·e sokbaaha. Una agre gipin sokbagiparangara Meghalaya Legislative Assembly-ni Speaker Thomas A. Sangma, WGH a·jani District Commissioner Jagdish Chelani, Superintendent of Police Abraham Sangma, Meghalaya Communication Department-ni Secretary Pravin Bakshi, iamangba re·bae bakko ra·angaha.
Da·alo, ia programo West Garo Hills a·jani chu·gimik ge 17 skulrangoni sak 400-na bate chatro chatrirang M-Tab ko CM’s Student Digital Learning and Scheme-nigita manangaha. M-Tab rangko poraienggipa bi·sarangna sualaniara digital content nigita pora skianiko namdapatna miksongani onga ine CM Conrad Sangma aganangaha.
Technology-ko jakkale smart classroom-rangko aro digital learning aid-rangko ra·bana sorkarini miksonganiko Sangma janapangaha. Tura aro Shillong songjinmao IT sector-ko tarina technology-ni dakna amani bilkoba ua aganangaha. School-rango Wi-Fi ko jakkalna man·enba MT-rango gitalgipa skie ra·ani content on·dapanirangko update ka·na man·anigita a·dok gimiko da·o optical fibre-ko sokatna tarienggipani bidingoba Sangma aganangkuaha.
Technology-ni gamchataniko Conrad Sangma dal·nike aganange, poraia skiani a·bako dingtang gadangona ra·e namdapatna man·agita sakanti chatro chatrirangko aro skigiparangko technology-ko jakkalchinaba ua tom·anio didiangaha.
