West Garo Hills, Selsella-ni NGO dolrang jekai FKJGP, ASWA, GSU, ADE, ANYO, GSMC, ACHIK aro NGCO, Selsella jolo 5G Internet-ko sokate on·china West Garo Hills-ni Deputy Commissioner Jagdish Chelani-na memorandum-ko on·angaha.
Selsella jolo 5G Internet-ko sokate on·genchimode salantio ka·na nanggipa kamrangko internet-ni ta·rakanichi namdapatna man·anggen ine NGO dolrang aganangaha. Unbaksana poraienggipa chatro chatrirangnaba online-gita bang·a nanggipa poraiani bakrangko aro changa sapaniko skie ra·na cholrangko on·angan baksana bading chiwale cha·giparangnaba online gita kamrangko ka·anio dakchakaniko on·anggen ineba NGO dolrang parakangaha.
Sagipa ding·giparangna sanna bannaniko ta·rake sokatna, ong·telaigipa a·selrangni bidingo aro kenbegni somoi-rango senggnang koborrangko man·soe tarisamsoe dongna 5G Internet-ko ra·baanichi dakchakani ong·anggen ineba NGO dolrang janapangaha.
Ia pilak neng·nikanirangko ta·rake nirokate Jio aro Airtel-ni 5G Internet-ko Selsella jolo sokate on·china Telecom Department-ko NGO-ni Chairman H N. Sangma aro General Secretary Changle T. Sangma mol·molangaha.
