January 13 tarik Sombar salo South West Garo Hills, Balalgre-o Captain Williamson Sangma State University ko nokdonggaani ja·mano Chief Minister Conrad K Sangma, Education Minister Rakam A Sangma, Higher and Technical Education ni Director Ambrose Ch Marak baksa Garoland State Movement Committee (GSMC) dolni Acting Chairman Balkarin Ch Marak, General Secretary Tony Tojrang B MaraK, Assistant Organizing Secretary Nikcheng Ch Marak aro Banang R Marak University o nangchongmotgipa department rangko ra·bae on·china tom·e chanchirimange memorandum ko on·angaha.
Garo Hills o batanggipa bilsi 50 na kingking Science stream ko ra·gipa chatro chatrirang namgipa gadangni skie ra·aniko man·a namen ja·manchakbeaha ine GSMC dol janapangaha. Mikkangchi Science stream ko ra·e porainasienggipa chatro chatrirangna nambate skie ra·na aro jat gimik ko niksengatna cholko ra·bana adita nakatbaenggipa aro mongsonggipa department rang jekai Artificial Intelligence, Robotics, Drone Technology, Nuclear Science, Advanced Biology, Advanced Chemistry, Physics, Biology, Chemistry, Zoology aro Environmental Science subject rangko ra·gate on·china mol·molangaha.
Una agreba Commerce stream-o Accounting, Auditing, Business Law, Finance, Cost Accounting, Business Management, Economic Development aro Financial Accounting department rangko ra·bae on·china janapangaha. Garo Hills o bang·a chatro chatrirang Arts stream ko poraina seokbatani gimin Garo Language and Literature, Arts and Culture, Tourism Studies, Sociology and Anthropology, Social Work, Music and Performing Arts, Education and Teacher Training, English Language and Literature, History and Peace Studies, Psychology, Library and Information Science, Geology and Geographical Information Systems subject rangko aro Law department ko ra·gatchinaba GSMC dol janapangaha.
University o Teaching aro Non-Teaching Staff rangni kamrangna rimnapanio maming mikkang nitegija Garo Hills ni man·a kragipa aro sapgipa candidate rangna cholko on·chinaba GSMC ia tom·anio aganangaha.
