East Garo Hills-ni Forest Training School, Baiza Abagre-ni sambao donggipa Simsang chibima-oniko niamko ja·rikgija an·chengrangko bikotanina East Garo Hills Division-ni Divisional Forest Officer-na A·chik Dedicated Integrity Leaders (ADIL) Central Executive Body H.Q Williamnagar-nigita uamangni jegalaniko mesokna chittiko sedoataha.
Ia niamgri an·chengrangko Simsang chibima-oniko bikotanio Shillong-ni Ambor Construction Company jak dongpaaniko ADIL dol parakataha.
An·chengrangko bikotna jakkalgipa garirang, JCB ML 13 5951, Dumper Truck AS 01 DD 6638 aro gitalgipa dumper truck bolgni jean registration number dongkugijagipako rim·na man·aha ine u·iataha.
Indake niamko ja·rikgija kamko ka·enggipa company-ni kosako am·sandianirangko dake ta·rake nirokatchinaba ADIL dolrang Divisional Forest Officer-o mol·molangaha.
