Captain Williamson Sangma State University ko January jani 13 tariko nokdonggae a·bachengatna tik ka·angaha ine Chief Minister Conrad Sangma parakangaha. Ia nokdonggaaniko University Campus jean Rerapara C&RD Block ni ning∙o donggipa Damalgre-o programko ong∙atgen jeon Chief Minister Conrad Sangma, Assembly Speaker Thomas A Sangma, Deputy Chief Minister Sniawbhalang Dhar, Cabinet Ministerrang aro officer rang dongpae bakko ra∙angtokgen ine u∙iatangaha.
A·dokni dingtang dingtang collegerangko ia gitalgipa State University baksa bakrimchina drajaenga maina collegerangni skanio pangchake NEHU, USTM ba je University baksaba jakgitel ong∙e bakrimna man∙aia ine Chief Minister aganangaha. Iako aganengon je collegerang ia State University baksa bakrimgija NEHU nigita ong∙genchimode Common University Entrance Test (CUET) ko chatro chatri rang sena nangchongmotgen ine Chief Minister Conrad Sangma agandapangaha.
NEHU o aro NEHU baksa bakrimgipa college-rango admission ra·na sikgiparang CUET porikka ko sena nangchongmotgen maina pilak Central Universityrango napna ia porikkako sena ma∙mong sorkarian ge∙etahani gimin mikkang bilsioni a∙dokni chatro chatrirangko ia CUET porikkako seaoni naljokatchina agangenchimoba a∙dok sorkarinigita champengatna man∙jawaha ine Sangma aganangaha. Indakgipa obostarangko chagrongrongani a∙selo a∙doko gitalgipa State University ko ra∙gatna kamrangko ka∙angaha aro State University baksa bakrimgipa collegerango a∙dok sorkarini dongimin niamrango pangchake kamrangko ka∙angna man∙an baksana chatro chatrirang CUET porikkako sena nanggija admissionrangko ra∙na dakchakanggen ine Sangma parakangaha.
India a·songo Meghalaya a·doksan state University dongja maina NEHU ko ra∙gatani ja∙manonin batanggimin somoirango maming nangnikaniko nikatjaha, indioba CUET porikkako sena nangchongmotaniko jegaltokani gimin State University ko a·bachengatna tik ka∙na nangaona sokaha ine Sangma aganangaha.
