January 13 tariko, Captain Williamson Sangma State University-ko oprakani somoio bi·aniko dake a·bachengna miksonganiko Khasi Jaintia Christian Leaders’ Forum (KJCLF) jegalaniko saksa social activist Greneth M. Sangma aganchakaniko on·ataha. Chong·motan batanggimin salo Education Minister Rakkam Sangma, a·dokni skanggipa university-ko oprakani somoio pilak toromni dilgiparangko okamate bi·chakchina sorkarini tik ka·aniko parakangaha.
Ia jajaanirang Education Minister-ni agangimin kattarang chong·motan Meghalaya Christian a·dok ong·ani gimin Christian-ni dakbewalogita bi·chenganiko dakgen ine agangipaoni ong·baaha. Iani bidingo Thma U Rangli-Juki (TUR) aro KJCLF secularism-ko janape Education Minister-ni kosako constitution-o dongimin niamko pe·ani ong·a ine matnangataha.
Greneth M. Sangma, KJCLF dolni agangipa kattarangna aganchakatengon, Meghalaya a·dok Christian bang·batgipa ong·a aro oprakna skang bi·chenganiko dakna nanga ine aganangaha. Secularism-o, toromko manderangoni chel·atani ong·ja jean a·dokoni toromko dingtangatanisa ong·a. Sakantian an·tangtangni bebe ra·aniko neng·nikani gri ja·rikna man·agita ia dingtangataniko nanga ine Sangma aganangaha. Unbaksana, bi·anichi a·bachenganiara Meghalaya-na gitalgipa ong·ja je a·songoba bang·batgipa toromni manderang apsankon ja·rikronga ine Sangma talatangaha.
Secularism-ko agananabate Christian bang·batgipa a·dokrango dakbaengagita KJCLF-ko ua bi·aniko dakaniko ra·chakchina parakangaha. Ian a·dokni dakarika aro toromko ja·rikaniko mesokani, unbaksana ku·cholsan ong·ani aro dingtanggrikaniko de·doani ong·gen ine Sangma aganangaha.
