South West Garo Hills Rerapara C&RD Block-ni ning·o donggipa Upper Damalgre-o gitalgipa Urban Health & Wellness Centre (UHWC)-ko mijal salo Rangsakona Constituency-ni MLA aro Khadi and Village Industry Commission-ni Chairman Subir Marak-ni jakchi nokdonggae on·angaha. Ian a·jani 6 gipa Urban Health & Wellness Centre ong·enga jekon 15th Finance Commission-nigita chamatgipa ong·a.
Ia gitalgipa Urban Health & Wellness Centre-o OPD service ko on·e song dam dokni sak 3000 songdongkamgipa manderangna nanganirangko on·a dakchakanggen. Ia Centre-o Medical and Health Officer, Staff Nurse, ANM aro Grade IV-o kam ka·giparangni dakchakanichi nangchongmotgipa sanna bannaniko sagiparangna sokatna dakchakan baksana blood pressure, blood sugar aro haemoglobin-rangko porikka ra·e nianikoba ka·na man·anggen.
Wilwilao donggipa songrango aro Centre-o health camp-rangkoba re·baenggipa sal somoirango ong·atna miksonganiko parakatangaha. Unbaksana ia Centre-o polyclinic-ni kam ka·aniko a·bachengatnaba niksamsoani donga jeon specialists jekai dental surgeons, gynaecologists aro orthopaedic-rangko antio changsarang songdongenggipa manderangni dabiani gita sokatgen ine Marak aganangaha.
Ia Centre-o indin sanna bannaniko on·a aro TB elimination campaign-rangko ong·ate porikka ra·aniko dakna, gisikni gita neng·nikanirangko man·enggipa chadamberangna ku·pattianirangko Centre-o dakna man·anikoba Subir Marak aganangaha.
Indakgipa Centre-rangko songona ra·bae on·e sanna bannaniko namdapatna mikkangchina uamangna dakchakanggen ine District Medical & Health Officer (DMHO), songni Nokma aro songni dilgiparangba ka·dongani kattarangko aganangaha.
