Reservation policy-ni bidingo name re·mikkanganiko dakna miksonge sorkarini Expert Committee songgipa pilak ku·pattianirang aro nangnikanirangko dingtang dingtang gadangni manderangoniko knae ra·ani matchotaha. Re·anggipa bilsionin Expert Committee a·dokni bang·a bakrangona chong·motan Shillong, Jowai, Tura aro gipin biaprangona re·roroe political dol, NGO, chatro chatrirang, dilgiparang, senior citizen aro dingtang dingtang gadangni manderangni reservation policy-ni bidingo agananirangko knae ra·angaha.
Ia somoirango, Garo Hills-ni bang·a NGO-rang, chatro chatri dilgiparang, senior citizen aro songko nokko re·dilenggiparangba an·tangtangni nangnika aro namnikatangko Expert Committee-na pakwatangaha.
Chief Secretary D. P Wahlang, iani bidingo talatengon ku·pattianirangko ra·a matchotmananiko janape Delhi songjinmao tom·e report-ko tarina re·mikkangna chanchirimaniko parakangaha. Ian Reservation Policy-ko name sakantini nangnikanirangko ra·e nambata gadango dakdilna sorkarini ja·ku ga·ani ong·a ine Wahlang aganangaha. Ua koborna parakengon, report-ko tarinagita basako aro badita somoi nanggen uani bidingo agana man·kuja ine parakangaha.
