East Garo Hills, Williamnagar songjimao Dawa Nengkatokgre antio rama paksachi donggipa adita dokanrangko wa·al kamaha. Ia obosta January 5 tarik walni 11 bajimangni gisepo ong·aha, aro wa·al kamani a·selko ma·sina man·tokjaha.
Songni manderangni agananigitade bijoli ching·chadoani a·sel ong·naba gnang ine chanchichipe agantokaha. A·sel ong·gipa biapona fire service department-ni manderang sokanggenchimoba wa·al kama namen bilakbeahani gimin wa·alko kimmitatna man·jaha.
Ia jolo cha dokan, unbaksanasa mesu samjakrangko palgipa, galamal aro gipin bosturangko palgipa sim·giparang gnang. Aganigitade, ia ong·a obostao chu·gimik dokan bol 12 ba 13 mangde kamchipaha ine u·ina man·aha. Indake ong·genchimoba, ia a·selo darangni janggikoba ra·jaha aro saknaa man·anikoba knasoa dongjaha.
