East Khasi Hills a·jani Mawlynnong o donggipa Church of Epiphany o saksa Akash Sagar, Christian toromko chonika gnang Jai Shree Ram ine chrikan baksana Hindu toromni gitrangko Giljanoko ringe roanina saksa Social activist Angela Rangad Bristibar salo uni kosako FIR ka·angaha.
Sagar ni Facebook aro Instagram o video tarie Christian rangni kosako name manchaan kal·stapna manchie kamko ka·anina Laitumkhrah police station-o FIR ko ka·angaha.
Rangad ni agananigitade toromo pangchake so·sojengjeng ong·atna miksongesa ua mande sakgittam ia kamko ka·angaha ine parakangaha jean India-ni Constitution ko pe·aniba ong·a ine aganjolangaha.
Indakgipa video rangko gipatanian ge·sa ge·gipin torom baksa nanggrikaniko aro mitchigrikaniko ra·baani ong·a ine Rangad parakataha. Ia pilak ong·gijagipa kamrangko nipiltaie je manderangan ia video tarianio bak donggiparangni kosako kragipa sastiko on·chinaba ua didiataha.
