KHADC aro JHADC-ni election-ko 2025 bilsini February 21 tariko ong·atnasienganiko a·dok sorkari parakataha. District Council Affairs (DCA) department-ni janapaniko man·e cabinet-ni parakataniko Governor ra·chakaha ine DCA-ni Minister Prestone Tynsong u·iataha.
Ia gegni district council-rangna chapa ka·gimin draft electoral roll-ko January 13 tariko on·gen aro maiba dingtangataniko dakna sikgenchimode bon·kamgipa tarikko January 22-ona donataha. Pilak dingtangatanirangko January 24 tarikoni dakenba January 27 tariko electoral roll-rangko bon·kame chapa ka·e on·anggen. Election-ni bidingo u·iatna nanganirangko January 27 tarikon parakatgen aro ua salonin district council election-ni dakna nanganirangko official ong·e a·bachengatgen ine Deputy CM u·iataha.
Nomination-na galna January 28-oni February 3 tarikona ra·chaknasienga, February 3-on scrutiny-koba ka·gen aro nomination-ko ra·galna sikgiparangna February 4 tarikko bon·kamgipa sal donataha. Pu·onani result-ko February 24 tariko parakatgen ine DCA-ni Minister Prestone Tynsong u·iatangaha.
