East Garo Hills, Williamnagar-o Garo Hills Autonomous District Council (GHADC) ni Branch Office aro Circuit Bench kulianiko batanggimin salrango GHADC-ni CEM parakataha jeon ia gitalgipa branch-o dingtang dingtang department-rang jekai Land & Revenue Department, Taxation Department, Forest Department, Building Regulatory and Development Authority (BRDA) aro District Council Court-ni Circuit Bench rangko songe on·angaha.
Ia department-rangko ra·gate on·anina Association for Democracy and Empowerment (ADE) dolrang GHADC ko mittelan baksana kamrangko namgipa bewalo ka·na man·agita ia department ge·brio ta·rakalen kamrangna advertisement-ko on·e rimnapaniko dakchinaba uamang mol·molangaha.
Advertisement rangko on·e maming mikkang nitegija kamna rimnapaniko dakanian Williamnagar songjinmani wilwilao donggipa chadamberangni kamgri rogiparangna cholkosan on·aigija mikkangchi GHADC ni nanggipa kamrangko nambate ka·angnaba dakchakanggen ine ADE dolrang janapangaha.
