North East Students’ Organisation (NESO) jean dam sni North East a·dokni ge 8 mongsonggipa dolrang jekai Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aro All Arunachal Pradesh Students’ Union (AAPSU) December 11 tariko Black Day ko ong∙atna tik ka·angaha.
Ian batanggimin 2019 bilsini December 11 tariko Citizenship Amendment Act 2019 ko ra·gataniko North East a·dok gimikni jegalani chinko mesokna gisik ra·aniko dakna miksonge ong·atangenga. North East Students’ Organisation (NESO) dolrang December 11 tariko pilak North East a·dokni manderangko mongsonggipa biaprango gisimgipa nisanrangko aro gisim banner rangko tapchina gita ge·etangaha.
Iako dakanichi ma·mong sorkarina Citizenship Amendment Act 2019 ko namnikgijaniko ku·rang on·aniba ong·gen ine NESO dolrang janapangaha. Ia Act-ko apsan ku∙cholsan ong∙e jegalanio pilak North East a·doko songdongenggipa manderangko jak on∙pachina aro dakgrikaniko dontongjachinaba NESO dolrang mol·molangaha.
