Chang 9 gipa Brahmaputra Valley Film Festival o Elvachisa Ch. Sangma aro Dipankar Das-ni tarigipa ”Chanchisoa” jawilwat Best Short Film award-ko man·angaha.
Batanggimin somoioba ia jawilwat Mumbai International Film Festival oba award ko man·angaha. Unbaksana Busan Film Festival aro International Film Festival of India (IFFI)-o jawilwat-ko wate on·a seokako manangaha.
”Chanchisoa” minute 29-ni jawilwat ong·a jekon North East a·dokni Garo Hills-ni nokdango tangka paisanigita neng·nikaniko chagronganio pangchake tariaha. Ia jawilwato ma·gipani neng·sikimani, pagipani mikkangchake kamrangko jotton ka·ani, dedrangrangni nama gadango poraina miksonganiko aro jikgipani nokdangoni matnanganirangko man·e janggi tanganiko mesokaha.
