Adita sal somoirangna koborrango Trinamool Congress ni dilgipa aro Meghalaya ni gitcham Chief Minister Dr. Mukul Sangma ni Congress dolo naptaipilna miksongani kattarangko mijal salo ua raken jegalataha. Kobor ra·timgiparangna parakatengon, Sangma uni Congress dol baksa bakrimna nangani mingsa ja·pangkoba nikatja maina sorkariko rikenggipa NPP baksa Congress dolrang apsan melie kamrangko ka·enga ine ua matnangatskaaha.
Manderangni mikkango Congress dolrang NPP ni kosako matnange agangenchimoba, ia party ge·gnini Khasi Hills Autonomous District Council o apsan bakrime kam ka·aniko nikna man·skaenga ine Sangma parakangaha.
Sangma ni Congress dolo napna miksonganirang dongja ine janapan baksana mikkangchi uni chu·sokanio manderangni chakpaaniosa pangchakanggen ine ua aganangaha.
