MP Saleng Sangma, NPP dolo susae Gambegre constituency bye-election o chegipa Dr. Mehtab Chandee A. Sangma-na katchapaaniko on∙ate campaign-o uamangni party-ni ku∙chakagita kamrangko chu∙sokatchina aganangaha. Ian bye-election san ong∙ani gimin indakgipa election-rango ruling party-rang cherongbata jeon manderang dingtanganiko nangesa pu∙onronga ine Sangma parakangaha.
Gambegre constituency-ni ning∙o ua bang∙a dakna nanggni kamrangko janapange chadamberangna kamrangko ra∙bae on∙aniko aganangan baksa ku∙chakgiminrangko sorkari chu∙soke on∙a ka∙dongsoaniko parakangaha. Congress dol bilo ong∙jagenchimoba manderangni election-o bakko ra∙e uamangni party-na pu∙onaninaba ua dingtang mancha Gambegre-ni manderangko mittelangaha.
Sangma, Gambegre constituency-o chang 3-na kingking MLA ong∙angaha jeon ua MP-ko susae cheani ja∙mano uni a∙damko watangna nangaha. Garo Hills-o da∙o Congress doloni saksaba MLA dongjaha aro a∙dok gimiko saksa kamkam MLA-san ong∙rikaha. MP election-o Saleng Sangma changgitamna kingking MP ong∙soe donggipa Agatha Sangma-ko amchepatani ja∙mano da∙o apsandake Congress doloni uni palo susagipa Jingjang M. Marak-ni kosako Chief Minister-ni jikgipa Chandee Sangma chegipa ong∙angskaaha.
