WGH, Garo Students’ Union (GSU), H.Q Tura, pilak chatro chatrirangni palo Post-Matric Scholarship-na galatanio Parents’ Income Certificate-ko man·a neng·nikaniko man·enganina ra·chakani bon·kamgipa tarikko ra·doatchina Education Minister Rakkam Sangma-o mol·molataha.
Scholarship-na galatengon Parents’ Income Certificate nangchongmotgipa ong·a. Unbaksana, ia certificate-ko Deputy Commissioner Office-onikosan ra·na man·ani gimin chel·a biapo donggipa chatro chatrirang noktang songtangona re·bapilna nange somoinigita aro una agreba bang·a neng·nikanirangko on·a ine GSU dol parakataha.
Apsan somoion, December jani skanggipa antio porrikarangko ong·atna tik ka·manaha jeon scholarship-ko galna aro porikkana tarisona bang·gija somoirangni gisepo dakna nanggni ong·gen ine GSU dol aganangkuaha. Iarang pilakko mikkango done scholarship-na galatani bon·kamgipa salko 2025 January 31 tarikona ra·doatskachina uamang Education Minister-ko mol·molangaha. Salko ra·doatanichi chatro chatrirangna porikkako maming neng·nikgija sena man·an baksana nanggipa lekkarangko ra·na somoiko on·gen ine GSU dol janapataha.
