Manderangni janggi tanganio namgipa paikanarang aro rongtal an·tale dongna nangani bidingo mikrakataniko ra·bana, mijal salni gisepo West Garo Hills, Tura-ni DRDA Conference Hall-o “Hamara Shauchalay : Hamara Samman” ba “Our Toilet is our dignity” katta bichongko done World Toilet Day Campaign-ko a·bachengataha. Ma·mong sorkarini Drinking Water and Sanitation department, Ministry of Jal Sakti-ni ning·o a·bachengdilgipa ia program-ko District Swaach Bharat Mission Gramin (DSBMG), WGH Tura ong·atangenga.
World Toilet Day-ko pilak a·songrango bilsio changsa gisik ra·e paikanarangko rongtal an·tale jakkalani bidingo manderangna mikrakatna a·gilsak gimikchin campaign-ko ka·a.
PHE-ni Superintendent Engineer aro DSBMG-ni Member Secretary, Ambrose D Sangma, tom·anio aganengon namgipa paikanarangko jakkalani, sabisirangko man·ani aro uarangoni naljoke dongna mikrakaniko on·a gamchataniko u·iatangaha. WGH a·jao Open Defecation Free (ODF) ba bangbango paikana re·aniko dontongatna man·ani chu·sokaniko Sangma parakangaha. Indake ong·genchimoba songadam nokadamrango ki·chakgipa a·kilokrangko name tarijani a·sel sabisi batrikrikna altuani gimin ua talatangaha. Uni gimin jako ra·enggipa department-rangko ODF plus-ni gadangona sokdona niroke kam ka·angchina Sangma didiangaha.
Ia campaign-ko November 19-oni December 10 tarikona ong·atanggen. Ia campaign, manderangni bakrimaniko ra·bae a·jao nokantio aro songsalo mande sakantian paikana jakkalaniko namdapatna man·agita apsan ku·mong nangrime kam ka·aniko dakanggen. Iana agre Social Welfare, Education Department aro gipin line department-rangkoba apsan bakrimenba Anganwadi centre, school aro manderangni jakkalgipa biaprango rongtal an·talaniko tang·doatna kam ka·china Sangma didiangaha.
Programme-o West Garo Hills District Social Welfare Officer Madonna T. Sangma, District Planning Officer incharge T. A. Sangma, District Coordinator, DSBMG-ni dingtang dingtang a·jaoni block-rangni dongpae bako ra·angaha.
